黃宗澤 12月13號踏入45歲，除咗偷閒慶祝，希望世間再無天災人禍之外，近日正投入拍攝新劇《風華背後》嘅佢，亦獲劇組就特別為佢準備一系列驚喜慶祝，好似訂製咗1:1實物原大嘅名牌手袋蛋糕，又大合唱魔性生日歌，同劇拍擋譚俊彥、丁子朗，以及一眾女角朱茵、蔡少芬、王丹妮、鄭希怡，仲有樂易玲等都一同為Bosco慶祝。
劇組提前以Bosco於《新聞女王2》中嘅爆紅經典名牌袋為靈感，復刻訂製造型蛋糕，加上傳統燒豬炮製驚喜。身穿律師袍現身嘅Bosco見到蛋糕時亦高呼：「嘩，好大個！」，現場眾人隨即齊聲合唱：「所有的煩惱說bye bye，所有的快樂說Hihi」，笑爆全場。
Bosco之後邀請大家合照時笑說：「好難得有咁多女生包圍！」又分享生日願望話：「希望《風華背後》收視大好，更重要嘅係世界無災無難，每個人都平安快樂、健健康康。」佢仲話多年來生日大多身處劇組度過，晚上就會同朋友食飯共聚。
事後Bosco指收到蛋糕造型逼真非常驚喜：「冇諗到因為《新聞女王2》，呢個袋會咁受關注！最抵死蛋糕入面仲有一包牛奶，像真度太高喇。」被問到會否買禮物獎勵自己時，佢就話：「我平時就鍾意收藏古董袋，見到合適就會收藏，生日反而冇特別打算買啲咩。」
