TVB台慶綜藝節目《帶阿姐看世界》第三站不丹行程，阿姐汪明荃與羅家英「花式放閃」，噚晚播出不丹篇最後一集，佢哋坐直昇機Tour升上4,000 米高空，輕鬆俯瞰藏傳佛教聖地虎穴寺，隨後前往當年梁朝偉與劉嘉玲婚禮嘅酒店，享受熱石浴「鴛鴦浸浴」，家英哥浸浴時不忘自豪晒白滑小腿。
阿姐與家英哥喺鏡頭前罕有肉帛相見，羅家英仲爆「閨房樂」，話閒時喺屋企有幫愛妻做Facial，笑言退休後可以發展美容事業，展開「第二人生」。
家英哥對老婆全程照顧有加，流露充滿愛意嘅眼神，當家英哥見阿姐喺羊毛披肩專門店Shopping，即「唐僧」上身試圖勸阻，皆因阿姐被色彩配搭鮮艷的披肩火速吸引，買癮大發，最終家英哥決定「眼不見為淨」，先行離開店舖，見到愛妻滿載而歸，佢嚇到打咗個凸，仲對鏡頭做出「錢錢飛走」嘅手勢，而家英哥仲自爆最長紀錄，試過等阿姐Shopping等足兩粒鐘。
雖然Shopping時意見分歧，兩人互動依舊甜蜜。當家英哥撒嬌要求獎勵嗰陣，阿姐即幽默送上兩巴「掌」大玩食字 Gag，話要「獎」勵老公，隨後深情表示「有你陪住我，我點解唔幸福呀」。
阿姐喺節目尾聲問羅家英，「你話你同我講嘢對牛彈琴，我唔夠關心你定咩」，羅家英就直接回應：「而家你審我？」阿姐史無前例地流露出熱戀小女孩般嘅可愛神態，讓觀眾見證呢對老夫老妻最真摯一面。
