台慶綜藝節目《帶阿姐看世界》不丹篇噚晚（13日）播出最後一集，喺不丹篇3集嘅內容，觀眾完全感受到 汪明荃 同 羅家英 夫妻間嘅默契同真摯。每逢家英哥嬉皮笑臉或者一臉正經介紹景點，阿姐都無乜反應，只係結尾時畀個微笑，但係家英哥仍然樂在其中。
夫妻兩人喺不丹接受高僧祝福，有如重新感受一次新婚感覺，畫面溫馨。而家英哥悉心安排嘅影結婚相環節，亦係今次旅程重點之一。嚟到不丹篇尾聲，家英哥亦為阿姐準備禮物，而呢份禮物就係兩人不丹結婚相嘅郵票同相架，阿姐收到時非常滿意大表鍾意。
兩人又邊享用浪漫晚餐時，互相道出心底話，阿姐先向家英哥講：「最緊要身體健康，注意飲食，記得食藥打針。」家英哥聽完阿姐真誠寄語後，發從心底微笑。接住佢就講「啊...大人！我喺度祝福妳永遠青春，思想敏捷，行得走得。仲有，要長命過我。」阿姐聞言就問「嘩...點解呀！」家英哥感觸一句「我舒服啲囉！」字裡行間完全感受到兩人互相嘅關懷、珍惜以及愛。
