眨吓眼就到年尾，亦係樂壇開始派發成績表嘅時候，今年樂壇新人輩出，當中女團方面，就有由伍樂城親自監製嘅全新女團 Honey Punch ，六位平均年齡得14歲嘅成員Casey、Jacey、Keira、Alma、Chelsa及Colour日前現身商場，舉行第二首派台歌《滑到入心》見面會，林超賢導演、火火以及填詞人林寶現身欣賞女團演出。
Honey Punch除咗演繹新作，火火聯同謝茜嘉即場擔任評判，要求六位女生倒帶重回選秀時嘅表演，最後兩人都話難分高下，難怪佢哋會一齊被公司選中組成女團。問到Honey Punch再次倒帶比賽感受如何，佢哋話：「覺得自己進步咗好多，以前上台前會好緊張，而家學識放鬆自己專注演出。」六人都覺得家人同粉絲嘅支持，係佢哋向前嘅動力，Jacey同Chelsa話好開心每次演出都能夠同大家互動、分享團隊嘅一切，結束活動又可以落台同現場粉絲合照，派明信片留念。 
Honey Punch 將以生力軍女團組合身份參與即將舉行嘅樂壇頒獎禮，隊長Casey覺得既驚喜及意想不到「好難想像只係幾個月入面發生嘅事，我哋一定會好好訓練，繼續努力。」面對其他女團，Honey Punch覺得自己始終係初出道，會將其他女團視為學習對象，佢哋話「獎項固之然恨有，但仍然會先做好自己，將最好嘅音樂分享畀大家，始終團員年紀仲細，仲會有很多機會。」