林雪近年因體重暴漲，加上左臉嘅黑斑越嚟越大笪，顏色亦越來越深，不禁令影迷擔心佢嘅健康狀況，更有網民猜測佢係因糖尿病引發嘅黑色棘皮症。而林雪早前出席電影活動時，曾為臉上黑斑解話，當時佢指醫生話因為佢成日側睡，左邊臉經常被壓，所以先會形成黑印。
可能林雪都知呢個解說說服唔到一眾網民，所以15號佢就上載咗一條自己做醫美嘅片段，並於帖文中寫道：「多謝大家關心 #林雪」。而喺片中林雪解釋自己臉上黑斑嘅來源，佢先多謝關心佢健康嘅網民們，然後就指自己一直有做開醫美，而上次出席活動時，大家見到佢臉上黑斑印加深，係因為佢做完醫美後「起焦」，所以叫大家唔使擔心佢，仲話自己會好快變返靚仔同大家見面。
影片上載後，雖然唔少網民都唔太信服，但仍留言提醒林雪要關注自己嘅健康問題，紛紛留言「要小心飲食，管理體重及三高🙏🏻💪🏻」、「做醫美冇用，你要減肥，做運動調整飲食」、「最緊要身體健康呀！」、「阿雪瘦d好」。
