《中年好聲音4》最新一集「決戰TVB藝人賽區」噚晚播出，10位TVB藝人戴神秘面具獻唱，僅 「企鵝人」唱《Touch》獲5燈滿分直接晉級，Deep V「獅子王」女歌男唱《誰來愛我》亦同樣成為焦點，惹嚟網民競猜二人真實身份！
「企鵝人」以黑色西裝出場，戴企鵝面具以「拉筋式」演繹古巨基經典歌《TOUCH》，憑靚聲奪得5燈，俘虜一眾評審，肥媽發現「企鵝人」專注唱歌，同時緊張到手不斷震。由於把靚聲幾似基仔，就連張佳添都笑問：「其實你係咪古巨基啊？」
由於「企鵝人」未有喺節目揭曉真正身份，引嚟不少網民喺「企鵝人」演出後化身偵探，憑唱功、身高、側面等鎖定「企鵝人」有機會係鄭俊弘或視帝張振朗，另有網民估阮浩棕或周志康。網民話今次終於等到高手出場，有網民指張振朗本身唱歌真係好好聽，又有網民憑「企鵝人」當日配戴嘅飾物，話「企鵝人」係參加過《超級巨聲》嘅周志康，相信謎底好快揭盅。
至於，獲得4燈嘅Deep V爆肌「獅子王」，歌聲穩定中帶柔情，谷婭溦大讚「獅子王」先聲奪人，張佳添就讚揀歌揀得好，揀啱歌一開頭就吸引到評審，「獅子王」笑指有一年因睇得太多卡通片，阿媽覺得佢好嘥時間，就喺暑期掉咗佢去泰國，當時「獅子王」每晚聽住呢首歌，諗住喺香港嘅朋友，頓時覺得好孤單咁喺張床度喊，而主持車婉婉忍唔話：「我本來仲想問你，係咪俾人飛過好多次，點知原來『飛你』嗰位係你阿媽。」而網民就估「獅子王」係被封「女神收割機」嘅型仔羅天宇。
