製作經年，唔少觀眾都引頸以待嘅《尋秦記》電影版月底就正式公映，電影公司同步公佈更多劇照以及重新灌錄原版主題曲《天命最高》MV，更多新片嘅畫面亦同步公開。
當年 古天樂 主唱嘅《天命最高》旋律一響就勾起唔少回憶，而新版古仔就同 林峯 共同合唱，兩人近年合作無間，而全新編曲更具電影感，氣勢全面升級，將項少龍與趙盤跨越時空嘅師徒情仇推向另一個層次。
古仔指今次同阿峯合唱，與當年獨唱原版感覺大有不同，而阿峯仲話早前紅館演唱會合唱《天命最高》，某程度已為錄音作好準備：「今次再認真啲，又有重新編曲，希望繼續有屬於我哋嘅歌，最好跳埋舞。」
古天樂直言知道唔少觀眾一聽到《天命最高》前奏就會「起雞皮」：「呢四個字都係一個使命，雖然話呢個世界冇最高，但我哋盡力去做啦，等於我哋拍《尋秦記》咁，過程裏面經歷好多困難，但都一一克服。」林峯就特別提到，希望新版保留原版開頭嘅馬叫聲，而MV亦確實保留呢一聲馬叫向原版致敬。
MV中多位重要角色逐一亮相，除咗項少龍（古天樂 飾）、秦王趙盤（林峯 飾）、烏廷芳（宣萱 飾）、琴清（郭羡妮 飾）、善柔（滕麗名 飾）、滕翼（黃文標 飾）、「陶總管」陶方（歐瑞偉 飾）以及李斯（陳國邦 飾），仲有已率先亮相嘅項寶兒（朱鑑然 飾）等先後出現。
MV亦首次揭示多位新角色，包括Galie（白百何 飾）、Ken（苗僑偉 飾）、石頭（張繼聰 飾）、Max（吳樾 飾）、Phil（洪天明 飾）、Dan（Chris Collins 飾）、聞桑（廖子妤 飾）、萬良（蔡一智 飾）、Tim（徐偉棟 飾）、武樹（洪天照 飾），以及「肥腸」徐浩昌同伍詠詩等。各組人物於MV中交錯呈現。
電影全陣容海報亦同步公開，背景嘅巨型山河圖橫跨其中，象徵跨越千年嘅終極宿命。正中由項少龍同秦王並列而立，凸顯兩人矛盾。海報下方就有多位古今角色並列，一次過曬冷登場。海報亦特別加入飾演「烏博士」嘅已故演員廖啟智(智叔)，向佢為劇集版同電影版貢獻致敬。