早前脫離Beanies以個人之姿踏上音樂旅程嘅 黃健怡 繼年初《小人國》後再推出個人創作嘅新歌《超級市場關門前》，仲再一次邀請到 黃偉文 填詞、黃兆銘編曲、陳考威監製，加上由Dear Jane 嘅Tim擔任MV導演，盡得前輩們傾力支持
今次係Winky首嘗以愛情作題材嘅抒情歌，佢話：「要好赤裸裸咁呈現自己嘅內心，學歌詞話齋『像我這種性格，只表面勇敢，心底不瀟灑』，其實唔只係講愛情，喺家庭、關係甚至係工作上都啱用。做音樂嘅路上，遇到好多面對選擇嘅時候，外人眼中我好似好大膽，其實入面有好掙扎同不安。」
社會一直對女性有唔少既定期望，而對於愛情Winky直言從未有太大憧憬：「只係拍過一次拖嘅我，其實唔知咩係愛情就同對方一齊咗，所以講到結婚呢個題目，對我嚟講實在太過陌生。係咪真係要將貨就價？而家嘅時代唔同咗，以前年代好多人30歲前就會結婚生仔，我覺得如果只係為結婚而結婚，寧願慢慢等真正同我可以相處過下半世嘅人。」
Winky又直言個性獨立，認為自己一個亦開心：「點解一定要有男朋友？尤其我係創作歌手，反而需要更多空間時間去創作，相對地嚟講，我會覺得生活得更加自在。」
同Wyman第三度合作嘅佢，直言收到歌詞時大感震撼：「我相信Wyman了解咗好多我嘅個人特質，所以佢寫咗呢份詞俾我。」更坦承自己就如歌詞般只係表面勇敢，心底毫不瀟灑，尤其今年佢離隊獨自發展：「好多選擇都要自己去做決定，好多時我睇嚟可能好似好勇敢，甚至好瀟灑，其實我嘅內心絕對有好多嘅不安，驚同擔心。」