王祖藍今年聯同本地及海外歌手將於12月底辦藝人之家40周年嘅音樂會，呢日祖藍與吳文忻（現名吳忻熹）作客TVB娛樂新聞台《StarTalk》，談及音樂會籌辦過程。

祖藍坦言賣飛冇耐，發生大埔屋苑宏福苑發生五級火災，起初曾考慮取消音樂會，後嚟收到來自世界各地嘅觀眾留言，指大家喺呢個時候更加想嚟香港，畀香港人一啲支持，祖藍先決定繼續做，之不過內容及宣傳上作出好大修改。

祖藍話呢次好多唔同地方嘅「藝人之家」成員為咗今次呢個騷，專登飛返嚟參與，包括杜麗莎、喬媽小金子、黃愷欣等，祖藍透露小金子早排身體需要一啲特別照顧，當知道藝人之家40周年，小金子特登喺西雅圖返嚟，皆因「藝人之家」係佢同喬宏叔創辦。

吳文忻話最近出咗新歌，今次自薦參加音樂會，好想發放正能量，主動聯絡祖藍，冇諗過祖藍二話不說直接答應，吳文忻好感恩喺呢段抗癌時間仲做到音樂，佢指今年初聽到Sammi（鄭秀文）拎「我最喜愛女歌手」得獎感言，深受觸動，令佢重燃唱歌呢團火，決定出新歌。

吳文忻又指人生每日要少少Me Time去休息，而祖藍坦言忙工作同照顧家庭之外，今年社會上亦有唔開心嘅事，加上私事煩心，祖藍自覺有啲疲倦，身邊嘅吳文忻就建議佢要多啲休息。