《萬千星輝頒獎典禮2025》日前公布10強入圍名單，憑《奔跑吧！勇敢的女人們》提名嘅 蕭正楠 就失落頭10，雖然冇份入圍有啲遺憾，不過阿蕭就表現得好大方，佢話好感恩自己遇到好好嘅劇組同對手，亦祝福其他有份入圍嘅拍檔同埋劇集，喺頒獎禮可以得到好成績。
阿蕭同 曹永廉 下個月將會去佛山開騷，今次仲有一位生力軍加入，就係視帝馬國明喇。阿蕭話初初係馬明主動提出想一齊登台，咁啱時間配合到，就邀請佢一齊開騷，不過最大問題係馬明話自己淨係識唱三首歌，旁邊嘅 黃翠如 一聽到就即刻話唔緊要，因為馬明高大又靚仔，只要企喺度，做咩都冇所謂。
呢日阿蕭同翠如係到一間國際學校參加一個護眼活動，陪小朋友矇眼食午餐，阿蕭大爆老婆一行入學校就不斷視察環境，似乎已經開始為蕭哈哈嘅未來鋪路，兩公婆就坦言已經開始想像蕭哈哈返學嘅情景。
而講到嚟緊嘅聖誕節，翠如就話好姊妹連詩雅邀請佢帶埋小朋友一齊影寫真，不過要睇司機阿蕭得唔得閒，既然老婆開到聲，阿蕭又點會say no吖？