「中聲」唱將 李金凱 自參賽至今，一直廣受戰友同Fans愛戴，近日佢嘅生日會就齊集「中聲」家族好友同歌迷祝賀，金凱以自己嘅動人聲線回禮答謝大家厚愛，又同「中聲」家族由台上唱到台下，將生日會變成演唱會。
金凱指從來冇諗過有咁多人愛錫自己，好感激大家一直嘅支持，令佢非常感動。佢仲邀請同月同日生日嘅羅逸軒一齊切蛋糕慶祝。講到生日願望金凱又再體現無私大愛，佢將願望送予大埔災民，祈求受影響人士早日回歸正常生活。
為咗令到好友同Fans加深對自己了解，金凱特別剪輯自己嘅成長片段，講述媽咪10歲時因車禍離世，之後自己失去雙手嘅點滴，以及成長中遇到嘅愛。片段令全場為之動容，唔少人都因而落淚，當中包括肥媽，喺佢身邊嘅劉洋仲先後遞足五次紙巾。譚輝智亦表示從片中令佢對金凱有更深了解，婉婉就話好少人有能力以自己嘅聲線道出故事，大家要珍惜金凱，點知講講下連佢都忍唔住眼紅哽咽。
