謝婷婷（Jennifer）2019年誕下女兒Sara，淡出幕前並移居加拿大生活，今年2月高調公開與外籍型男Mathew嘅甜蜜合照，雖然大方公開另一半身份，不過佢未透露對方係咪女兒生父，婷婷同年7月順利生咗阿仔Brooklyn Milne，不時大曬一家四口嘅幸福美滿家庭照。
43歲婷婷噚日（17日）喺社交平台上載多張溫馨合照，慶祝與Mathew嘅周年紀念日，佢哋仲同Sara影咗唔少嘅合照，以及為阿仔Brooklyn Milne慶祝出世100日嘅照片，當中見Mathew抱住BB時，疑似戴上婚戒，未知婷婷同Mathew係唔係已秘婚！
婷婷收穫美滿嘅愛情，見佢同Mathew行超市，婷婷坐喺購物車由Mathew推落斜路，喺另一半身邊即變大細路，盡情享受浪漫甜蜜時光。婷婷透露噚日係二人周年紀念日快樂，佢感恩二人組成咗一個非常了不起嘅家庭團隊，仲感謝Mathew喺過去兩年裡面，每日為佢帶嚟歡笑，仲話「You truly are one in a trillion. ILYSM ♥️♥️♥️（ 你真的是萬億分之一。我非常愛你）」。
