旦哥鄭丹瑞大女鄭瑤舊年與金融才俊男友Jacob拉埋天窗，兩個月前，鄭瑤就喺社交平台分享懷孕喜訊，懷着巨肚嘅準媽媽不時影孕照留念，近日仲喺屋企舉行Baby Shower。
一對準爹哋媽咪廣邀好友見證重要時刻，包括林德信一家三口，Tyson Yoshi與太太Christy，仲有鄭瑤嘅妹妹鄭珉。派對令鄭瑤嘅豪宅曝光，擁有雙邊落地玻璃兼超高樓底嘅巨廳，即使近二十人影大合照，環境仍然非常闊落，而且客廳中仲放置咗應節高約三米嘅聖誕樹。
主人家悉心佈置派對現場，充滿溫馨氣氛，不過就未有公布Baby jz嘅性別，但係鄭瑤好友嘅留言就似乎露出玄機，因為佢話急不及待想見到Baby jz，而用咗「Her（她）」來形容Baby jz！
