草蜢為慶祝成軍40周年，推出新歌《老的辣》。相隔七年再拍新歌MV。草蜢三子為準備拍攝MV誠意滿滿，除操弗身型，又帶備幾個行李箱嘅靚衫上陣，蔡一傑笑指好耐冇拍MV，平時買咁多靚衫，今次要傾巢而出，蘇志威就話導演吩咐每人要準備3套衫拍攝，結果佢哋每人帶咗13套衫到場，將成個MV變成時裝騷一樣。
拍攝期間，草蜢要企喺自轉舞台上唱歌跳舞，來來回回轉咗半個鐘後，三子都話有啲暈陀陀。蔡一智就話睇落簡單嘅鏡頭其實好難，要有好好嘅core muscles（核心肌群）先做到啲動作。蔡一傑補充：「因為周圍漆黑一片咁樣旋轉，視線冇焦點，仲要跳舞，真係好難。所以做人最緊要『有焦點』！」跟住佢就好風騷指是日焦點就係佢哋腰間嘅腹肌上，MV中三子簡直係腹肌放題大派福利。
今次係蔡一傑首度喺MV以「DJ Remus」身份表演打碟，配合燈光，帶動全場氣氛，台前幕後都起哄吶喊，蔡一傑話多年前已經開始打碟，好多人都唔知佢係專業嘅DJ，今次喺MV重出江湖，將來演唱會after party，佢都可以打碟，同大家一齊玩！身旁蔡一智乘機賣廣告拉生意話：「生日、結婚、開party都可以叫蔡一傑嚟打碟，打畀我就會安排佢到會。嗱，我哋依家一條龍服務，打呢個電話搵我。」
拍攝時發生小意外，「行兇者」蔡一智現身說法：「有一場我揸住咪線係咁揈，好有型，點知揈揈吓飛咗支咪出去，幾乎擲到人。」蘇志威笑指同佢當年台上飛鞋底一樣，蔡一智即翻眼：「唔好講遠古嘅嘢啦！我頭先真係好驚，好彩支咪乖乖落地！」
