今年係陳曉東入行30年，喺呢個咁值得紀念嘅年份，東東就收到一個開心消息，日前喺《第四屆香港紫荊花國際電影節》公布嘅得獎名單中，佢憑電影《騙我一輩子》榮獲「最佳男主角」，亦係東東30年以嚟首奪影帝。
東東當初應導演李力持邀請，僅為客串角色，但導演喺片場臨時調整，決定將東東角色變成男主角，東東話：「真係好感謝李力持導演嘅信任同賞識，拍攝過程中真係好享受，能夠挑戰過往較少嘗試嘅喜劇表演，有詼諧、爆笑、感動，絕對係自己一貫形象上嘅一大突破。」
電影另一亮點就係東東首度與大女朵朵陳芷霖合作演出，戲中兩人跟現實一樣係父女關係，演繹時兩人真實感情交流演出，東東起初以為咁樣可以令當時5歲嘅女兒更容易投入感情，估唔到反而係幫助自己演出，「感謝朵朵喺拍攝期間嘅投入同體諒，令我喺角色詮釋上可以更貼近父親內心世界，為電影增添細膩且動人嘅層次」。
今次係東東事隔22年再度跟李力持同前輩吳孟達合作，對於跟已故前輩吳孟達同場演出，陳曉東直言獲益良多，「感謝達叔喺片場一直照顧我，佢提醒過我『戲縱有多種演法，但永遠不要在螢幕上交行貨』，呢句對演員嘅箴言，我永誌難忘。」東東亦多謝戲中兩位拍檔胡杏兒同謝天華。
東東首奪影帝，感謝家人一直支持，以及劇組所有台前幕後配合，佢有感而發：「希望多一點戲可以搵我拍，目前獎座會先寄到電影公司，跨年後應該可以拎到，到時再拍片畀大家睇。」
