新劇《璀璨之城》一眾演員張智霖（Chilam）、陳煒、吳卓羲（阿Ron）、高海寧（高Ling）、張曦雯、陳曉華、陳瀅、孔德賢（Danny）、蔡一智、姜大衞及蔣家旻等，呢日現身澳門出席開鏡禮，嘉賓何超鳳及一眾TVB高層亦有參與其中，齊齊切燒豬，祈求拍攝順利，場面盛大又熱鬧。
鮮有拍劇嘅蔡一智，呢次繼《衝上雲霄2》客串後，再有機會同Chilam阿Ron合體，火花令人期待，阿智仲當自己新人咁，話要趁機學嘢，佢話自己好乖，一直喺旁邊偷師學演技，希望打開戲劇之門，阿智話當年Chilam拍嘅第一部劇《沖天小子》，就係同佢一齊拍，兩人仲有爬山戲份添！
高Ling呢次飾演Chilam太太，兩人劇中有唔少對手戲，雖然高Ling劇中受盡Chilam折磨，劇情唔太relax，但好彩鏡頭後，佢就好識嘆，高Ling話食得好住得好，唔覺意肥咗少少，Kelly直頭話自己好似過闊太生活，連放假都唔想返香港。至於蔣家旻同周志康呢pair，甜蜜欠奉，關係仲令人窒息，長期處於女尊男卑嘅關係，阿康都話好慘吓。
講到《中年好聲音4》日前播出藝人賽區蒙面對決環節，有網民偵探上身估企鵝人係周志康，阿康雖然未有正面回應，但佢就話應該幾好玩嘅。呢日舉行開鏡禮嘅《金碧坊》亦係呢部劇取景地點之一，呢度對Danny嚟講一啲都唔陌生，事關佢已經喺呢度開工咗幾日，Danny話呢度最吸引佢係包羅萬有嘅美食，呢日一班演員亦大飽口福。
