48歲TVB前主播方健儀（Akina）與任職無綫新聞工程人員洪楚恆結婚15年，今年8月方健儀喺社交平台貼咗一張肚凸凸惹嚟懷孕疑雲，佢收到各方祝福，方健儀日前接受鍾慧冰嘅網上節目訪問，親解唔生B之謎，直認多年嚟與老公喺生B方面出現嚴重分歧，仲話老公至今仍希望生一隊足球隊，方健儀笑稱生得嚟都搞唔掂。
方健儀跟老公洪楚恆年紀相差7歲，由於過往男朋友屬於高大威猛型，一開始未有諗過拍拖，覺得對方肥嘟嘟、眼睛細，當初只覺得對方好cute，慢慢被對方嘅細心打動芳心，試過有次方健儀喺大庭廣眾被編輯鬧冇新聞觸角，跟住佢同洪楚恆喺車廂獨處時，情緒崩潰爆喊，洪楚恆乘勢搭住方健儀嘅手，戀情由始而生，方健儀笑言：「老公廣泛散播謠言話『我媾佢』同『我追佢』，梗係佢追我。」
二人由拍拖到結婚至今19年，方健儀直認不諱喺生B呢方面，至今與老公仍未能達成共識，方健儀好權威咁講係自己話事：「個肚喺我度，梗係唔生啦！佢其實好鍾意小朋友，佢見到朋友嘅小朋友，佢對眼係bling bling好開心，而小朋友都好跟佢，佢有個磁場，小朋友唔跟佢阿爸阿媽，而係跟恆叔叔，我以前覺得佢係值得擁有一個小朋友，甚至乎或者更多。」
方健儀後嚟「縮沙」，有感現今世代嘅小朋友嚟到呢個世界好辛苦，入學校要競爭、喺社會工作又要競爭，方健儀覺得客觀條件唔適合，而主觀條件亦覺得自己太忙，懷疑自己係咪適合做媽媽。
方健儀爆55歲老公至今仍然好恨生小朋友，想生隊足球隊，但方健儀覺得要將時間放喺屋企，可能影響工作，所以佢不斷同老公講唔好生：「生得嚟我搞唔掂，你都60歲退休啦，到時啲人以為你係佢阿爺阿公呀，咁樣唔好嘞，咁尷尬，唔好生嘞，繼續潛移默化，唔好生嘞唔好生嘞。」
當主持冰姐讚方健儀係孝順女，經常帶父母去旅行，被問會否希望將來有小朋友服侍自己？方健儀坦言曾經想過，後嚟覺得呢個諗法太自私，因為每個人都有自己生活，而家亦會覺得未有太多時間陪伴父母而感到內疚。 方健儀計劃50歲退休，於日本及英國均擁有物業收租，佢希望將來能夠與老公喺唔同地方旅居，盡情享受人生。
