2008年香港小姐季軍馬賽相隔十年，日前重返電視城，與過往曾同佢共事嘅監製嘉玲姐見面，馬賽頭戴Cap帽、一身便服出動，進入TVB電視城內隨即打卡自拍，片中馬賽首先以城巴作背景，透露自己2008年開始經常搭呢架巴士往返電視城，十年冇返嚟，此行要搵以前好關照佢嘅監製嘉玲姐飲茶，兩人喺餐廳碰面一見如故，仲面貼面打招呼。
馬賽指參選港姐前，即2007年時已喺TVB娛樂新聞台做實習生，兜兜轉轉已經18年，感慨物是人非，走入電視城西餐廳內，馬賽有感回憶湧現，雖然覺得餐廳十幾年冇變過，但佢深刻記得幾乎每張枱都坐過，仲記得同咩人坐，大家傾過啲咩，睇得出佢重臨舊地感慨萬千，離開電視城後佢不忘喺大門前同TVbuddy留影，寫上「再見永遠感恩提攜過我的人」，畫上行程句號。
馬賽現時一家長居內地生活，早喺2008年選美獲季軍後加入娛樂圈，事業發展不俗之際，卻突於2014年爆出艷照風波，事業直插谷底，馬賽返回內地重新開始，並於2019年低調與圈外男友結婚及誕下女兒，婚後專心相夫教子，慢慢開始經營KOL重振事業，十年事過境遷，馬賽已擺脫陰影享受新生活同家庭樂，活在當下！
