由F4嘅 言承旭 周渝民 吳建豪加上 五月天 阿信 呢個新組合舉行嘅「F✦FOREVER恆星之城」巡迴演唱會，首場19號晚喺上海舉行。當中言承旭喺個人表演環節中重現《流星花園》經典一幕，悼念2月病逝嘅大S，令無數粉絲感動落淚。
《流星花園》中道明寺送杉菜流星頸鍊嘅一幕，相信好多劇迷都記憶猶新，當言承旭唱到《我是真的真的很愛妳》時，佢打開行李箱攞出流星頸鍊，掛喺天文望遠鏡上，呼應道明寺同杉菜用望遠鏡睇流星，並送出定情流星頸鍊嘅名場面。言承旭喺演唱過程中雙手合十，又閉上雙眼祈禱，明顯眼濕濕，睇得出情緒好激動。
雖然言承旭同大S當年拍攝《流星花園》時屢傳不和，但佢係大S離世時，佢曾經發悼文指大S係自己生命中非常重要嘅角色，「S，是那個每一次，只要被需要時，從來沒有缺席過的天使。」而今年8月佢亦曾被目擊低調前往金寶山悼念大S。
