天王嫂 方媛 10月先誕下第三胎，產後短短幾日就現身為老公 郭富城 慶祝生日，仲已經火速恢復纖瘦身材，令大家驚嘆不已。日前方媛結束長達56日嘅雙月子，隨即喺社交平台晒新相，寫到：「出月子啦，出來感受一下冬天的氛圍感。」
方媛著住米白色樽領冷衫襯牛仔褲，配上畫家帽，睇上去悠閒又不失時尚感，背景有香港街頭聖誕燈飾同埋大型聖誕樹，其中一張側身相，見到方媛腹部平坦，點睇都唔似三寶媽，相信好多女士都一定好羨慕。
據知城城為咗俾太太最好嘅照顧，豪擲200萬安排方媛入住頂級月子中心，並選用最高規格嘅雙月子「女王套餐」。方媛透露，自己體重由懷孕前83斤增加到現時嘅92斤，雖然未完全恢復懷孕前體重，不過佢似乎無多在意，仲講笑話：「吃回二十幾歲的體重，感覺更健康。」
