由 鄭俊弘 黃劍文 陳凱彤 同 葉巧琳 等人合演；以哥哥張國榮為主題嘅音樂劇，將喺明年再度重演。呢日大家去到排舞室為演出排練，有過上一次嘅經驗，呢次相信佢哋更加得心應手，難怪大家話呢次感覺興奮多過緊張喇。
為咗呢次嘅演出，除咗要落力練歌，熟習舞步之外，劍文仲多一個mission，就係要擺脫排骨仔變成肌肉男，事關佢話之前開show，被嫌身形太單薄，所以之後就努力健身，過咗年幾，終於可以見到成果，連演出服都差啲唔啱著呀。
嚟緊聖誕節，劍文就要喺工作中度過。相反阿Fred就可以放低工作，享受吓天倫之樂，佢仲話今年佈置咗棵聖誕樹，將阿仔嘅聖誕禮物放喺樹下，唔會預先畀仔仔，希望佢學識忍耐呀。
