TVB舉辦嘅節目《中年好聲音》為唔少中年人提供追夢舞台，而此節目亦成為觀眾熱捧節目，就連港產荷里活男星歐陽萬成 Jimmy O Yang 亦有留意《中聲》，更因此而啟發佢打算舉辦「師奶好聲音」。
歐陽萬成日前喺社交平台上PO片宣布，將會喺明年2月嘅澳門新年騷，將會加插「師奶好聲音」環節。片中歐陽萬成表示：「香港現在最火熱的節目就是《中年好聲音》，嗰啲中年人36、38歲，咁我而家都算中年人呀？有冇搞錯呀？咁我而家就想搞一個比賽，真係叫『師奶好聲音』！」佢指呢件事將會喺佢2月於澳門嘅演出中實現，而呢個「師奶好聲音」將會邀請一眾真・師奶嚟一場真才藝演出，現場鬥歌。
歐陽萬成呼籲一眾有興趣嘅香港同澳門嘅真・師奶，於社交平台投稿，畀佢哋揀中嘅真・師奶將會有機會同佢一眾登台舞台，喺一萬名觀眾面前參加史上首次「師奶好聲音」。
另外，歐陽萬成喺片中亦公布2月嘅澳門騷由於門票早已售罄，故宣布嚟緊將會加場，同觀眾一齊共度農曆新年。
港產荷里活男星歐陽萬成 Jimmy O Yang，今年6月於紅館舉行嘅棟篤笑掀起撲飛潮，由原本只開一場嘅演出，三度加場最終加開至五場。
