沈火新同顏光興兩位導演舉行收徒儀式，唔少圈中好友都嚟到見證，而罕有露面嘅黃一飛亦有現身，84歲嘅飛哥仍然精神奕奕，做訪問時不停發放笑彈，佢話估唔到咁多朋友仲喺度，因為佢都以為自己唔在生。
問到佢點保持自己84歲仍然咁精神？佢話自己都唔知點做，不過養生之道就係瞓覺，近年腳開始老化，出入都要代步車幫手。講到做人最緊要係開心時，飛哥就爆笑話唔要開心，因為有事先要「開心做手術」，所以高興就好喇咁話。
黃夏蕙就話同兩位導演相識幾十年，平日致力行善嘅佢，今次趁住聚會同老友見面，而雪梨上月啱啱完成音樂會演出，佢話由於大埔火災，所有活動都變得低調，嚟緊聖誕都唔會太多慶祝。潘志文同樣好開心見到好多朋友，佢話平日都係忙於工作，於TVB接拍劇集。
