2001年播出後成為經典穿越劇嘅《尋秦記》，電影版亦終於終於會喺31號大除夕正式上映， 區永權 日前就率先為大家預告，ENews節目《一周星星》將為大家帶嚟《尋秦記》特集，記得星期日留意節目播出喇。
而喺劇集版身為刺客嘅 善柔 滕麗名 ，日前就公開部份電影劇照，當中有佢脅持住林峯、又手持劇集版中項少龍為佢帶來天上彩虹嘅水晶非常深情，亦可見佢同幾位同係項少龍紅顏知己嘅美女拍檔 宣萱 仲有 郭羨妮 合照，真係回憶返哂嚟呀。
電影未上映，大量唔同形式宣傳早已率先開始，好似同餅乾零食合作嘅人物卡牌，就成為唔少Fans嘅收藏之選，連阿滕本人亦都搶埋一份，不過所謂財不可露眼，結果就被一眾資深幕後人員包圍，最後佢就要交贖金先甩到身喇。
鏡頭一轉，阿滕同多位《愛．回家》拍檔身處服裝室，齊齊拆盒大量餅乾，唔止乖仔 周家洛 參與，就連丹爺都拆埋一份，而 陳浚霆 更係一買就一整排餅乾，可惜拆完一輪阿滕都抽唔中自己，仲話要多謝三太 樊亦敏 割愛送出幾張俾自己咁話。
《一周星星》 逢星期日晚 22:00 翡翠台