44歲視后胡定欣今年10月宣布與外科醫生男友陳健華（Akin）於新西蘭皇后鎮拉埋天窗，正式榮升「醫生太太」，早前好友胡杏兒去定欣新居housewarming，定欣近日亦喺社交平台分享新居照片，見佢嘅愛巢以簡約裝修為主，今年係定欣首次以幸福人妻身份，跟老公歡度佳節，呢位人妻花心思佈置巨型聖誕樹。
定欣新婚燕爾，日前上載幾張悉心佈置巨型聖誕樹嘅相，見佢居住嘅豪宅樓底極高充滿空間感，佢哋婚後第一個聖誕節，定欣悉心佈置2米高嘅聖誕樹，見呢棵巨型聖誕樹放喺客廳角落，充滿濃厚節日氣氛。
定欣曾指二人結婚計劃咗一年，並非閃婚，只係二人達成共識，想完成結婚儀式後先同朋友講，至於生兒育女則順其自然，定欣透露由於老公並非家中長子，因此二人冇生育壓力，目前盡情享受浪漫嘅二人世界，閒時就約好姊妹相聚，近日佢同豹嫂跟好友黃智雯慶祝生日，生活非常寫意！
