由五月天阿信、言承旭、周渝民、吳建豪組成嘅F◆FOREVER組合，日前喺上海展開一連四場演唱會，呢站亦係四子巡唱首站。雖然開Show前發生朱孝天抗議被踢出計劃一事，但小風波未影響阿信同F3三子心情。
四子以一身型爆車手裝登場，以新歌《放手一搏Always Be My Bro》炸爆舞台，令所有歌迷尖叫不斷。
阿信為呢個Show出心出力，唔只親自上場玩埋一份，仲做埋演唱會製作人，務求令F3歌迷重拾美好回憶。所以唔只Fans，就連三子都好感謝阿信嘅付出。
演唱會焦點之一，就係阿信為Jerry炮製新歌《愛你啊》，兩人合唱時上演雙王對陣一幕，令歌迷極之興奮！呢一Part更成為網上熱議，仲有人為佢地組成「言而有信」組合。
不過喺第二日開Show就發生嚇人一幕，阿信喺步上升降台前不慎趷腳冚親頭，仲差啲失平衡向前仆，好彩有保鏢拉住，認真牙煙！
而成個Show最勾起歌迷回感動同回憶嘅一幕，相信就係四子企喺天使之翼喺裝飾下演唱新歌《恆星不忘 Forever Forever》，同埋以F4名曲《流星雨》帶動大合唱，為全晚演出作結。