《萬千星輝頒獎典禮2025》第二階段投票進行得如火如荼，晉身最佳男女主持十強嘅 陳庭欣 陳懿德 何沛珈 區永權Albert 鄭衍峰 同 許文軒Edmond 呢日就現身電視城拉票。
《萬千星輝頒獎典禮2025》第二階段投票 2025年12月28日晚上截止
上屆「最佳男主持」嘅得主Albert，被問到有冇信心冧庄？佢話有信心未必會贏，無信心就必定會輸，所以自己係有信心可以去到澳門，着得靚靚同大家見面。
而鄭洐峰就話作為唯一一位90後可以入圍十強，自己已經好開心，不過佢呢句講完之後，作為對手嘅Albert同Edmond都即刻靜咗，Albert仲將個火引到其他入圍者身上：「如果我係思浩我嬲你呀！」之後Albert又指Edmond拉票攻勢相當勁，唔只去到《東張》拉票，仲獲最高話事人承諾會投佢一票，Edmond都話當時聽到對方咁講，自己嘅心情亦都好開心。
至於講到會投邊個，鄭洐峰就話會投阿Bob、Albert 同Edmond，問到佢點解唔投自己？佢就話算啦，叫大家下年再投返畀佢呀。
「最佳女主持」十強同樣係競爭激烈，Toby就話有睇好嘅人選，仲喺鏡頭前力撐拍檔朱凱婷Heidi，又話知道自己嘅水準去到邊。
何沛珈就入到圍就已經好開心，加上過往一年有咁多作品出街，覺得自己已經做咗一張好好嘅成績表。陳懿德就話對其他入圍者好有信心，同時又趁機向廣告客戶力薦咁多位入圍嘅主持呀。