今年係一代武打傳奇 李小龍 85歲冥壽，早前佢嘅千金 Shannon Lee 李香凝 同 外孫女 Wren Keasler 就來港參與活動，佢哋對香港舞蹈團將李小龍傳奇改編成舞台劇演出亦非常興奮，仲指舞蹈結合演出向武術致敬非常特別又有意義。
佢哋亦提供唔少文字同圖片資料協助創作，當中更包括大量李小龍生活、工作武術同哲學上嘅資料。雖然一代傳奇已離世逾半世紀，不過佢嘅影響一直流傳至今，Shannon一直管理亡父遺下嘅海量資料，佢覺得整個過程都非常有趣，而身為李小龍嘅千金，自己管理父親嘅一切都非常理所當然。
Shannon指雖然責任重大，不過一直努力傳承同發揚爸爸嘅想法，就算生活低潮甚至哥哥意外身亡，亦係因為爸爸生前嘅指引令佢可以重拾正軌。
雖然父兄都喺Shannon年幼時就離世，不過佢回憶過往生活亦充滿樂趣，笑指哥哥非常鍾意整盅自己，又透露媽媽不時都四出遊歷享受生活。而外孫女Wren就提到，三代女性一齊旅行係自己最深刻嘅家庭生活，仲笑言有如三名少女一齊出行咁話。