張學友 20場60+巡迴演唱會 香港終章星期二於紅館開鑼，今次已經係學友第11度踏上紅館舞台，更創下成為於紅館累積個人演唱會場次最多嘅歌手，多年來演出已達203場，締造新紀錄。
64歲嘅學友雖然不時提及自己已屬60+，但依然狀態大勇，輕鬆一字馬令全場歡呼。回到紅館演出巡唱「終章」嘅學友，已經唱到第305場，學友以一曲《留住這時光》為演出揭開序幕，之後由一班舞蹈員伴隨出場，以一身皮衣皮褲造型唱出《Ooh La La》，之後再踏上古董車頂唱出《馬路英雄》。
學友其後演出一連串經典慢歌好似《我應該》、《等你等到我心痛》、《深海》、《三天兩夜》等，全場觀眾都沉浸喺浪漫情懷之中。而唱罷《我真的受傷了》後，學友同大家打招呼話：「香港嘅朋友你哋好！其實我想講山頂嘅朋友你哋好，但山頂已經唔係好山頂。所以，買最前飛嘅朋友好傻，其實後面都睇到，哈哈！」之後又話：「只要企喺度，我就會覺得我係張學友，歡迎大家嚟到張學友60+巡迴演唱會嘅第305場。」
學友指演唱會樂團同團隊只休息3星期：「我有個有唔好嘅習慣，一休息就病，小休小病、大休大病。休息嘅第一星期，將之前嘅感冒清咗佢，之後諗住打下波，點知打完條腰就唔郁得，可能呢啲就係60+嘅問題。早幾年，我以為60歲好多優惠，但原來係65歲先有。但…過幾個月我就65歲喇！哈哈！」
學友嘅歌曲陪伴大家走過41年，佢感慨話：「我唔知大家會唔會諗住今次係我最後一次開演唱會，所以無論如何都要睇咗先。我自己都覺得我覺得、懷疑、怕係最後一次。上一次我開時，都係怕、懷疑、以為係最後一次，但過幾年咪又係唱。」說罷學友就表演一字馬，輕鬆起身力証自己寶刀未老：「睇我自己起到身就知，我上次係爬起身。所以唔使驚，我仲喺度。」
學友於Encore環節高水準演繹《李香蘭》，而巡唱兩年多以來，包括樂手、舞蹈員同幕後工作人員都有人成婚。故特別準備愛情組曲送予新婚朋友，包括《你是我今生唯一傳奇》、《你的名字我的姓氏》等。最後學友以一曲《吻別》結束首場「香港終章」演出。