陳法拉 日前獲品牌邀請，出席喺紐約下城區退役地鐵站Bowery Station中工藝坊舉行嘅時裝騷。法拉欣賞完後大讚話：「整個騷戲劇性好強，見到唔同年代丶唔同角色嘅人物出現，就好似紐約嘅縮影。見到服裝嘅刺繡工藝，印象非常深刻。」
近年定居紐約嘅法拉喺當地經常乘搭地鐵：「因為趕時間搭地鐵會比較方便，所以有時會著得隨意啲，就好似今次時裝騷一樣。地鐵入面有各種形形式式嘅人，見到很多人生百態，有時會俾自己有唔同嘅靈感。」
法拉又認為紐約最迷人嘅地方係文化藝術交集：「呢度有好多唔同嘅藝術家，例如畫家丶舞蹈家丶演員等，佢哋來自世界各地，都帶住一種夢想或者想追尋自己嘅夢想，就好似我喺度學習戲劇，希望繼續做演員。紐約好易接觸到唔同藝術，每日都有百老匯表演丶唔同展覽，係一個文化好豐富嘅地方。」
法拉再次自編自導嘅短片即將開工：「短片每個部門嘅工作都會參與，包括服裝丶攝影丶道具等等，每日不停開會。今次短片特別嘅地方，就係有英文亦有廣東話，故事內容遲啲再同大家分享，希望下年可以放映。」