周吉佩喺平安夜送咗一份好有心思嘅聖誕禮物畀fans，佢集合咗「中聲」family嘅 張與辰 顏米羔 魏嘉信 支嚳儀 丁文俊 龍婷 李佳 顏志恒 黃劍文 譚輝智 及 林彥言 ，一齊「合唱」咗佢首新歌《為何我比不上他》。
不過呢個合唱嘅方式就有少少特別，因為吉吉知道大家都非常忙，未必有時間可以去到錄音室錄歌，所以佢就選擇叫大家喺一個靜靜地嘅環境下，以一人一句voice message形式，將佢mark好嘅歌詞清唱出嚟，再由佢將咁多位嘅錄音後製成呢首「中聲電話錄音版」《為何我比不上他》。
成個錄製過程亦相當有趣，有人就極速奉上靚聲，而貼心嘅魏嘉信就驚吉吉唔知會唔會想製作埋影片，所以多問咗佢一句「使唔使錄埋個樣？」。不過當中最特別嘅就係丁文俊，佢先錄咗身處地方嘅環境聲畀吉吉，然後再以voice message表示：「我都好相靜呀，樓上裝修好X嘈呀。」而喺佢錄呢句時，都可以聽到類似打樁嘅嘭嘭聲，令到收到message嘅吉吉笑唔停。
而喺帖文中，吉吉感謝一眾好友陪佢癲陪佢完成呢個project，同時亦祝大家平安夜快樂。
