早自1988年嘅《今天應該很高興》開始，每年臨近聖誕節 劉以達 都會用創作陪伴大家度過佳節，好似《今天世上所有地方》、《明日之舞》等亦係聖誕作品。居住大埔區嘅達哥有見上月發生宏福苑世紀大火，除咗捐贈物資協助之外，仲創作新曲《靈之戰》，鼓勵歌迷喺現今戰爭同災難頻繁嘅世間，一樣要勇於面對負面情緒。
達哥認為生活就係一趟走過高山低谷嘅旅程：「但願呢首新歌可以喺悲傷停步時帶來安慰，繼續前行時帶來鼓勵，如果生活係一場又一場嘅戰鬥，咁生活嘅意義，並唔係征服別人，而係戰勝自己！」
劉以達個人包辦新曲《靈之戰》嘅曲、詞、編、奏、監所有角色，又邀請近年多次合作嘅女歌手Laraine Chan獻聲，佢話：「身處現世我哋唔止要同各種誘惑作戰，亦要同自己嘅心靈作戰，時刻自我更新。」
至於新曲MV就決定利用AI科技，達哥指：「呢個MV雖然主要運用AI技術，但整體感覺好人性化，適當加入AI作為藝術創作工具，可以話錦上添花，拓展好多想像空間。」