55歲阮小儀早前突然宣布離開效力長達30年嘅商業電台，「裸辭」希望開展新人生及享受生活，由於其有物業有事業，小儀獲封「黃金盛女」，今日喺社交平台上載婚戒照，開心分享脫單兼已婚雙重喜訊，唔少圈中好友送上祝福。
小儀近年罕談感情事，不時喺節目講單身貴族、單身焦慮等題目，曾自爆陷10年單身焦慮，觀眾以為佢愛情世界空白，原來小儀已名花有主，今日聖誕節貼出一張手戴婚戒嘅相，大曬情侶錶，並寫道：「2025年對我嚟講係一個好年份。 多謝你令我人生下半場更精彩。 亦想與愛我的你們分享， 多謝你們滿滿的祝福。 🤍❤️🤍❤️🤍❤️🤍❤️ 聖誕🎄快樂！」早前小儀亦貼出一對薑餅人嘅照片，呢個post係早有暗示！
小儀入行早期有位消防員男友，其後小儀曾喺節目罕談感情狀況，自爆曾與出版社CEO拍拖7年，已達談婚論嫁階段，但小儀30歲時突然被分手，更表示被前度多次背叛，就連男方父母都暗示佢唔好再等，小儀坦言每次戀情都輸畀第三者，雖然二人已分手多年，但呢段感情傷得小儀最深。
小儀多年嚟身邊不乏男性友人，更與節目監製阿金，電視節目拍檔金剛傳過「霧水情緣」，而森美一直有為小儀撥行大葵扇，曾透露之前有相士話小儀因佢而有得戀愛，指小儀啲男朋友都係經森美介紹，未知小儀呢位伴侶係唔係森美介紹㗎呢！？
