《萬千星輝頒獎典禮2025》舉行在即，各個獎項嘅最後10強都爭取時間努力拉票。黃宗澤為咗競逐視帝寶座，拍劇空檔都冇休息，親自落區拉票，不過聽到現場粉絲大叫「視帝」，Bosco就似乎覺得好尷尬。
呢晚拉票除咗出動燈箱廣告車，Bosco仲準備咗實用小禮物送畀大家，就係一個出氣包，上面仲印有Kingston嘅頭像，佢話大家有需有發洩嘅時候就可以大力揸爆Kingston。
《萬千星輝頒獎典禮2025》第二階段投票 2025年12月28日晚上截止
除咗有粉絲支持，大批Bosco嘅圈中好友包括 高海寧、蔡少芬、譚俊彥、蔡潔、袁富華 等都有拍片為佢拉票，就連 阿姐汪明荃 都拍埋一份，Bosco話阿姐好驚訝佢仲未攞過視帝，所以佢都希望今次可以憑Kingston奪下視帝寶座。至於頒獎禮戰衣，Bosco竟然大膽話考慮「唔著」喎！
心情大靚嘅Bosco同粉絲傾偈合照，但竟然有個假粉絲衝入來踩場，原來係咁啱都喺附近拉票嘅戴祖儀。Joey同Bosco即場互相幫對方拉票，二人仲興奮到邊叫邊跳，非常搞笑。
