55歲阮小儀聖誕節突然公布結婚喜訊，悄悄成為幸福人妻，小儀獲全城送上祝福，唔少網民好奇佢嘅神秘老公究竟係何方神聖，森美接受傳媒訪問時直認早知道婚訊，曾跟小儀夫婦食飯，知道咗咁耐都一直保密。
小儀今日（25日）聖誕節公開一張與男士撐枱腳嘅相片，未有公開男方身份，見二人無名指均戴上戒指，小儀受訪時就感謝大家祝福，搵到愛自己嘅人就足夠，願大家喺普天同慶嘅聖誕節，擁有愛與健康，享受生活每一刻。
網上有知情者爆料話小儀另一半係從事汽車事業，透過友人介紹認識，拍拖期間高度保密，好友為保護小儀愛情嘅愛苗，紛紛守口如瓶，更盛傳森美有份出席疑結婚飯局。
森美回應傳媒時指曾跟小儀夫婦有食過飯，澄清嗰個並非結婚飯局，當日係同小儀屋企人及幾個朋友食飯，眾人都好開心，對於小儀另一半身份，森美就三緘其口，叫大家問番小儀，佢要保護證人，又指愛情好難能可貴，自己要盡量保護小儀呢段愛情。