今個星期嘅《電影泉攻略》，主持 王鎮泉 Jeoffrey 帶大家去到洛杉磯嘅Santa Monica，深入《海綿寶寶：深海尋寶》嘅取景地，事關呢個系列電影嘅第五部即將上畫，今次繼續沿用一貫嘅錄音班底，佢嘅御用美國配音員Tom Kenny都話，希望呢一世都可以幫海綿寶寶配音。
大家咪睇海綿寶寶平時跳跳紮冇時停，好似好得意，其實佢係1986年出世，今年已經39歲，名副其實係一個中年大叔。而今次電影嘅大反派飛行荷蘭人，其實係源自於歐洲一個流傳已久嘅傳說，通常係講一個船長為實現自己願望，將靈魂出賣俾惡魔，代價就係成世都上唔到岸，不停喺海上漂泊，唔知今次海綿寶寶同佢嘅Battle會係點呢？
今個星期嘅新片速遞
《海綿寶寶：深海尋「寶」》，海綿寶寶同成班死黨再次衝出比奇堡，展開前所未有嘅全新冒險！渴望證明自己已經長大嘅海綿寶寶，為咗向蟹老闆展示自己嘅勇氣，決定穿越深海黑暗領域，追蹤神出鬼沒嘅幽靈海盜「飛行荷蘭人」！估唔到呢段爆笑又驚險嘅旅程，會將佢帶到去從未涉足嘅深海秘境。
《紐倫堡大審判》，二戰終結後，隨住納粹德國倒台，英、美、法、蘇四國決定合力展開史無前例嘅「紐倫堡審判」，以求讓希特拉接班人赫爾曼戈林等殘存嘅納粹領袖，接受法律制裁，並藉此將集中營內慘無人道嘅情況公諸於世。當法律對上最黑暗嘅邪惡，唯有揭發最赤裸真相，先至能夠阻止歷史重演！
《運鈔大劫案》，一場震驚全國嘅運鈔車大劫案發生後，警方所有嘅線索都指向一名女婿同外父，隨住警方嘅調查越嚟越深入，呢對互相睇對方唔順眼嘅冤家翁婿為咗證明自己嘅清白，不得不配合警方同劫匪鬥智鬥勇，不過會唔會係九死一生呢？
《狂蟒之災》，兩個老死由細癲到大，最大夢想就係重拍最愛「經典神作」《狂蟒之災》！中年危機大爆發，兩個麻甩佬的起心肝，衝入亞馬遜熱帶雨林開機拍攝，點知拍拍下居然有條真巨蟒現身，將荒謬混亂片場變成生死一線間嘅殺戮戰場！搏老命想拍成嘅「世紀傑作」，今次真係可能攞佢哋命。
今個星期嘅票房龍虎榜，截至12月24號中午，第一位《優獸大都會2》；第二位《美傭誘罪》；第三位《內幕》。
