呂良偉日前（22日）70大壽舉行生日派對，廣邀圈中好友出席，向華強、向太陳嵐、梁唐青儀、楊受成、甄子丹、袁詠儀、溫碧霞、章小蕙，王晶、薛家燕、馬德鐘、蔡一智、張耀揚、許鞍華、肥媽（Maria Codero）、蔡一智、巫啟賢及周美鳳等到賀，可見呢位不老男神一向人緣極好。
肥媽喺25日聖誕節正日出post曬出當日派對盛況，宴會上衣香鬢影，聚首一堂，場面溫馨熱鬧，肥媽仲喺台上跟與呂良偉太太楊小娟一齊唱生日歌祝賀壽星，並於社交平台寫道：「阿呂，生日快樂。願你歲歲皆如意，年年都順心，日日都平安喜樂❤️」
呂良偉與太太楊小娟於2001年結婚，育有一名兒子呂善揚，一家三口生活幸福愉快，噚日呂良偉喺社交網上載壽宴嘅影片，更分享人生踏入七十嘅感言：「人生七十，其實我一直得到上天嘅照顧，畀我呢一生人遇到好多貴人，因為呢啲貴人，令到我嘅一生，所行嘅每步路都平平穩穩、安安全全度過每一個關口。人哋問我，你覺得人生有咩意義？其實我覺得人生係一個體驗嘅旅程，我好開心有呢啲朋友同兄弟姊妹，你哋同我一齊，去欣賞沿途嘅美景、沿路嘅風光。」
70歲呂良偉當晚身穿白色襯衫搭配黑色西裝褲，佩戴名貴玉佩，帥氣十足，呂良偉現場高歌熱舞， 活力充沛，而呂良偉發表冧爆嘅愛妻告白：「我更要感恩嘅就係我太太楊小娟，一個仙女下凡到我呂家，小娟係我生命裏，非常非常重要嘅一個寶藏。」
呂良偉回望過去，指自己人生座右銘係呢一生冇失敗過，將人生經歷視為學習過程：「因為我唔係成功就係成長；我呢一生冇敵人，佢哋全部都係我老師，我唔係得到，就係學到；我呢一生都冇白走嘅路，做得好就慶祝，做唔好我就記住，所以我容許一切嘅發生，因為一切嘅發生，終將有利於我。」