李龍基未婚妻王青霞（Chris）去年因逾期居留、使用虛假文書及違反逗留條件在港接受僱傭工作等5項罪名，判監25個月，75歲基哥曾承諾待39歲王青霞出獄後即結婚，王青霞自今年7月出獄並回內地後，二人婚事只聞樓梯響，王青霞一直未有公開露面，而基哥多次被影到獨自生活，早前更傳出與龍婷親暱互動，「雙龍」傳出緋聞。
基哥多次否認與王青霞情變，近日傳出王青霞未正式離婚，並育有一名16歲兒子，基哥就話關於對方嘅事低調處理，強調到時會同大家交代，最近有YouTuber親睹王青霞喺佛山近況，冬至當日疑與「丈夫」喺屋企共晉晚餐。
噚日有報道稱 YouTube頻道「導遊哥哥」踢爆李龍基講大話，指王父根本冇去過德國，聲稱王青霞本身有老公陳先生兼育有18歲兒子，大時大節就會舉家食飯等，片中更貼出相關資料揚言王青霞已婚狀況，列出王青霞與陳姓男子嘅結婚登記及戶籍資料，表示二人於2007年結婚，兒子2009年出世，即現年16歲，但「導遊哥哥」卻稱係18歲。
王青霞近日被目睹喺父母嘅佛山工廠上班，親力親為搬運貨物，冬至當晚王青霞與疑似老公陳先生及一名中年婦食飯，「導遊哥哥」將證件相嘅中年男子跟疑似王青霞老公陳先生相片對比，發現原來係同一人，中年婦人似係王媽媽，陳先生明顯比基哥年輕力壯，「導遊哥哥」曾致電王青霞老公陳先生，以賣家身份聲稱搵唔到佢老婆王青霞買貨，藉此核實其身份，最初陳先生煞有介事。未知75歲基哥係情陷三角戀，定係「爺孫戀」玩完，二人早已分道揚鑣呢！？