聖誕檔有兩部熱血運動電影《逆轉上半場》與《金童》上映。兩片嘅主創團隊相約喺27號攜手謝票活動。呢日《金童》嘅主演 張繼聰 ，以及《逆轉上半場》導演 黃柏基 、演員 陳湛文、單焯翹（阿倫） 與 譚峻然（肥B） 齊齊現身戲院，與觀眾近距離交流，並送上親筆簽名電影球衣外套。
張繼聰與陳湛文曾於戲中飾演兩兄弟，今次謝票兩兄弟再集結為電影宣傳，阿聰感性表示開心見到香港電影展現團結互助嘅精神，亦感謝咁多觀眾入場，希望大家繼續支持香港電影，佢話：「支持Peter（陳湛文）嘅《逆轉上半場》。如果兩部戲都看，鬥志一定會更加旺盛，2026年就能無往不利！」
陳湛文就指喺拍《飯戲攻心》時，已知阿聰《金童》嘅拍攝，佢話見到對方嘅身形變化，明白佢係以自己條命嚟為電影賣熱血，所以希望大家可以支持阿聰：「佢喺戲裡打拳，我喺戲中教踢波，兩部都係充滿能量嘅運動電影。感謝大家留港消費、支持香港電影！」
阿倫則引用《金童》中嘅經典對白：「排骨就排骨，鉛筆就鉛筆，我係單焯翹！」肥B則笑指自己睇完《金童》後愛上凍賓7。
對於有網民質疑《逆轉上半場》謝票場僅有片中小演員出席，未符合觀眾嘅期待，導演黃柏基則作出回應：「得悉小演員在閱讀相關帖文後，自責『出嚟謝票好失禮』，知道觀眾對謝票場安排有不同期望，亦尊重外界對宣傳策略的評論，但同時希望大家理解，出席謝票的小演員同樣是用心完成作品的一分子。」黃柏基指小演員本身都係重要角色，而演員謝票並非單純工作，係希望親身聽取觀眾嘅觀後感，從中吸收經驗與學習：「希望外界多一分體諒，避免小演員造成心理壓力。」
