藝人之家日前舉行一連兩場聖誕音樂會，邀請大批圈中教友獻唱，喺聖誕佳節傳遞愛同祝福。近年移居上海嘅 孫耀威 亦特登返香港出席今次音樂會，Eric話雖然聖誕多數會有商演可以賺錢，但因為 王祖藍 嘅邀請，覺得音樂會好有意義，所以就推咗賺錢嘅工作共襄盛舉。
Eric話其實今年自己多咗時間留喺香港，因為爸爸身體唔舒服，想盡量爭取時間多啲陪佢，自己8月尾係汕頭開騷，日日綵排完就搭車返香港陪爸爸。之後爸爸過咗身，不過因為好多親戚都專程到汕頭睇自己開騷，所以爸爸嘅最後一程都有好多親戚陪伴在側。
衛蘭 同 衛詩 兩姐妹亦有同台演出，近期忙於巡迴演唱會嘅Janice就搵咗 冼靖峰 擔任嘉賓，Janice話當初擔任《聲夢傳奇》導師，雖然Archie並非自己嘅學員，但一直都好欣賞佢，都好想俾多啲機會Archie表演，所以先會邀請佢做嘉賓。
演唱會上除咗有好歌聽，亦有令人感動嘅環節，當中陳敏兒同小金子隔空同已故丈夫廖啟智同喬宏隔空對話嘅場面，就令王祖藍當場流下男兒淚。
