2014年參加《中國好聲音》出道；後以一曲〈大魚〉成名、深受大量歌迷歡迎嘅內地歌手 周深 ，即將於啟德主場館舉行跨年及元旦演唱會，今次係啟德開幕後首次跨年演出，唔止門票被秒殺，主辦、贊助商同「生米」都以高規格宣傳應援，海陸同步花式宣傳。
今次周深《深深的》巡迴演唱會香港站．將於除夕同元旦跨年演出2場，上月優先預售時超過50萬人同時搶票，唔少歌迷都表示發動近百親友團協作搶飛，可惜最後仍全員失敗。過去兩年周深已於內地唔同城市完成48場巡迴演出，今年初佢更走出國際，於世界四大洲唔同城市舉行10場表演，今次於香港跨年相信亦將為香港帶來數以萬計遊客到訪同周深倒數跨年。
演唱會舉行在即，主辦單位於香港各區黃金地段投放大量戶外廣告，又安排了巴士同電車廣告中環海濱活動空間亦設置「周深應援區」，以周深嘅IP角色「周可可」同「周嫑嫑」吸引生米打卡。角色仲手持茶餐廳凍檸茶同美食菠蘿油，可愛造型非常吸引又有本地特色。
生米亦兵分多路於各區商場、地鐵站投放多個廣告，其中由香港同海外生米組織嘅「米聚深海」，仲策劃「痛船」應援項目。 以仍航行中嘅中式帆船「鴨靈號」，安排22班「生米專場」維港游，於維港來回行駛。 
另外，全球近百個周深粉絲組織，將於演唱會期間聯合應援，啟德零售館到時會設有唔同應援活動，包括各種打卡點、免費周邊、遊戲活動等，將啟德體育園幻化成周深嘉年華。
