胡定欣去年11月承認目前與外科醫生陳健華(Akin）拍拖，告別8年單身生活，今年10月拉埋天窗，新婚燕爾嘅定欣，今日喺社交平台曬出同胡爸爸嘅合照，開心慶祝爸爸70歲生日。
定欣今日貼出兩張跟胡爸爸擺心心甫士嘅相，並留言：「Daddy…HAPPY 70th BIRTHDAY❤️祝您身體健康! 開開心心! FOREVER YOUNG!~🤪😘🥳」唔少網民讚胡爸爸外貌仲係好年輕，仲話定欣同爸爸好似樣，而圈中好友胡杏兒、陳煒、楊秀惠及袁偉豪等亦留言祝胡爸爸生日快樂🎂、身體健康❤️！
定欣18歲已入行，撐起弟弟完成大學畢業，堪稱100分孝順女。定欣受訪曾透露本身家境不俗，太爺時代已喺西環開海味店，家底算係中產家庭，父母曾努力打拼海味鋪，自己可以「瑤柱當糖食」，後嚟胡爸爸喺2002年生意失敗，祖業失守，人到中年轉行任職司機，一向孝心嘅定欣感到心痛，主動幫手養家，曾有「落難海味店千金」之稱嘅定欣，經過多年努力喺事業愛情雙豐收，胡定欣曾兩奪視后，今年更榮升醫生太太，開心做幸福人妻。
