75歲李司棋近年轉戰KOL市場，不時分享生活日常及下廚短片，由於女兒葉子青長居加拿大，司棋姐閒時就拍片接job，或者約老友相聚，葉子青早前由加拿大飛日本旅行，難得返港陪媽媽過聖誕佳節及新年，一向擅長煮嘢食嘅司棋姐即大顯身手，兩母女一齊喺屋企食大閘蟹鮑魚花膠大餐。
司棋姐喺IG分享母女合照，相中所見佢同子青食大閘蟹，又舉杯慶祝，司棋姐更煮拿手菜式畀愛女食，聖誕節又一齊四出打卡，葉子青喺影相時，繑實司棋姐手臂，可見多年嚟兩母女感情極好。
而資深傳媒人汪曼玲喺社交平台貼出與司棋姐女兒開心相聚嘅照片，原來係子青近日應加拿大旅遊發展局邀請，去飯店拍攝最出名嘅「黯然銷魂飯」，大家就約埋一齊品嚐美食，順道與子青見面，汪曼玲續道：「子青今次由日本專程飛香港，主要是陪媽媽過新年及聖誕假期。母女二人之前去了大馬旅遊，母女情深，其樂融融。」
司棋姐於1971年與法醫官葉志鵬結婚，3年後誕下女兒葉子青，1989年發現老公有第三者而離婚，司棋姐受訪時曾坦言傷心欲絕，指自己當時「坐移民監」，丈夫同阿女喺香港，大家相處時間少咗，加上自己對阿女管教比較嚴，因此女兒選擇跟爸爸生活，兩母女長達7年時間冇聯絡，直至1997年，女兒主動致電媽媽，兩母女關係重修舊好；葉子青曾經歷兩段失敗婚姻，2023年與從事攝影工作嘅男友再婚，司棋姐亦飛去加拿大見證女兒婚禮，開心女兒搵到好歸宿。
