日前發生觀眾不滿謝票場卡士是非嘅勵志電影《逆轉上半場》，女主角 梁詠琪 正身處西班牙，仲前往勁旅巴塞隆拿嘅主場開Live直擊，帶領住戲中「光希隊」嘅小演員一同朝聖，同觀眾開心理Share。
GiGi趁聖誕同家人飛到丈夫嘅家鄉西班牙過節，探望年邁嘅老爺、奶奶，GiGi早已計劃今年聖誕回鄉陪伴家人：「未能同《逆轉上半場》團隊喺聖誕一齊到戲院謝票感到可惜，見到大家努力謝票都好想參與。元旦後就會返香港，希望盡快同其他演員仲有觀眾見面。」
GiGi此行途經巴塞隆拿時，又把握機會以戲中領隊身份，帶領光希隊小演員到Spotify Camp Nou參觀。直播期間仲被不少遊客認出同要求合照。GiGi笑言：「巴塞球場係好多fans都想嚟嘅朝聖地，我哋都排咗好長隊先入到去。」
直播中GiGi同周衹月、單焯翹仲有譚峻然一齊分享拍攝趣事。又特別提到周衹月本身係足球員，希望佢可以喺國際球壇發光發亮：「好多觀眾因為呢套戲認識你，原來呢個咁靚嘅女仔係踢專業足球賽。你嘅第一套電影真係要多謝導演，拍得好好，將你踢足球嘅英姿呈現得好勵志，好多人都讚你倔強嘅眼神，好做到我表妹嘅感覺。」
周衹月亦感激導演信任：「多謝導演喺咁多人裏面揀我呢個唔太識做戲嘅女仔。好在有專業導師教我哋點樣演戲，令拍攝更加流暢。大家記得多啲入場支持《逆轉上半場》，睇多幾次會更開心。」
GiGi指接拍時曾擔心新片題材：「小朋友踢足球嘅題材喺市場上點走向都未知。一路拍攝遇到大家，見到你哋咁辛苦都冇怨言，一齊捱過成個8月，睇到成品真係覺得值得。」又透露唔少觀眾大讚單焯翹（飾 阿倫）口材好、反應快，係「潛質演員兼棟篤笑材料」。
GiGi仲為幾位主要小演員訂製印有英文名字嘅10號巴塞球衣，心思滿滿：「另外，我仲整咗三件，係特別送俾我哋部戲嘅觀眾，到時會送俾大家。」