新加坡天王 林俊傑 入行以來被稱為行走嘅CD，推出首張專輯就勇奪金曲獎最佳演唱新人獎。多年來JJ只曾承認同陳立冷嘅一段短暫戀情，雖然JJ2009年時曾因胃酸倒流而影響演出，令佢一度要暫停巡演，今年仲自爆2024年時發現心臟出現問題，不過一直都無礙JJ嘅事業發展。
一向對家庭同感情事都低調嘅佢，未知係咪因為有感父母年月漸長，加上去年心臟問題需服藥保持健康，於母親70大壽之際，突然公開「全家福」，與網紅女友「七七」一齊同父母合照。
其實年初時兩人戀情已經爆出，神通廣大嘅網友直擊JJ同模特兒出身嘅七七於外地拍拖。據指七七係廣東人，社交平台標示自己於紐約同東京生活，有指其父為內地大型上市公司老闆，七七亦繼承其亡母嘅大筆遺產。
JJ年初被爆情侶裝拍拖後未有正面回應或否認，不過突然正式公開女友身份，更一齊拍攝全家福，就令外界猜測JJ係咪同比自己年輕廿歲嘅七七好事近喇。JJ呢個Post專注為母賀壽，只係寫道：愛不需要長篇大論，而是無論晴天或雨天，都堅守在彼此身邊，給予最真摯的陪伴。是一種快樂的見證！
親愛的媽媽，祝您70大壽生日快樂！祝您永遠被愛包圍著、健康、幸福、充滿笑容！
