全新節目《尋歡作樂的姐姐》嚟緊1月5號就會首播，呢日一眾美女 何依婷 戴祖儀 何沛珈 林凱恩 劉曉昆 就齊齊現身記招，分享佢哋北上暢遊嘅難忘片段，而呢日記招上亦邀請咗兩位香港先生李偉健、李善恆嚟同一班靚女一齊互動。
之但係已經有家室嘅依婷，面對猛男當前，心情就似乎有啲複雜噃，當主持 陳庭欣 叫依婷摸下李善恆嘅二頭肌時，佢表現得有啲欲拒還迎，仲強調自己唔係自願，只係順應主持要求，認真搞笑。
其實呢次依婷喺節目中，主力都係食食食，好少同小鮮肉互動，相反單身嘅戴祖儀，就唔駛顧忌咁多啦，好似呢次行程中佢就有機會去體驗下男僕咖啡廳，祖儀喺玩遊戲時，更被小鮮肉餵食棒棒糖，搞到祖儀面都紅晒，佢仲話自己平時比人感覺好似好大膽咁，但其實真實嘅佢係好怕醜架。
而有傳同 阮浩棕 結束兩年情嘅何沛珈，呢日就獲猛男一展臂力嚟個單手抱，見佢冧滋滋嘅樣，睇嚟心情未太受情變影響，佢就指自己的確回復單身，仲話同浩棕一直都係好朋友，而家都有保持聯絡，而分手消息傳出後，何沛珈話收到好多朋友電話慰問，但係因為太多而未能一一回覆。
林凱恩呢次跟住昆昆遊上海，亦都令佢大開眼界，佢仲對上海嘅男仔有更深嘅了解，仲話原來上海男仔特別鍾情姐姐，更爆昆昆喺當地好有異性緣呀。
《尋歡作樂的姐姐》1月5號起 22:30 翡翠台