草蜢 日前喺馬來西亞舉行巡唱尾二站，全場座無虛席，氣氛高漲，三子都話被粉絲嘅熱情融化，蔡一智表示雲頂雖然好凍，但一開場已經熱血沸騰，當堂覺得暖晒。而開場前佢哋喺後台準備時，已經聽到歌迷震耳欲聾嘅歡呼聲，令佢哋都充滿力量呀。
其實演出前，傑仔因為患上感冒病咗一個星期幾乎失聲，所以演出前，傑仔都唔敢講嘢，亦都努力戒口，就連佢最愛嘅榴槤都唔敢掂呀，相反佢兩位兄弟就不停引誘佢，真係少啲定力都唔得呀，好彩演出時，傑仔仍然保持水準，佢話歌迷熱情嘅支持，就係佢最好嘅良藥呀。
呢次嘅巡唱由2022開始，直到而家臨近尾聲，草蜢都覺得好唔捨得，阿智話呢次巡唱嘅內容，係佢非常滿意嘅program，所以真係依依不捨。而完成一月最後一站後，草蜢又要為四月嘅紅館全新演唱會做準備啦。
