蔡依林出道26年，首次喺台北大巨蛋舉行一連三場演唱會，Jolin呢次耗資九億台幣，打造頂級視覺聽覺舞台盛宴。Jolin 化身慾望守護者，以超巨大慶典公牛霸氣出巡，震懾全場四萬名觀眾，更被歌迷封為史上最狂開場。
之後Jolin化身大地精靈，企喺三層樓高嘅巨型蟒蛇上穿梭全場，同歌迷近距離互動，氣勢磅礡，有網民仲話現場效果，可以媲美奧運開幕一樣咁震憾呀。
呢次Jolin為歌迷演繹超過30首重新改編嘅金曲，並率領36位嚟自世界各地嘅專業舞者，喺舞台上又唱又跳，演唱《DIY》同《I’M NOT YOURS》，全場四萬粉絲high爆全場，氣氛推至頂點呀。
