宣萱Jessica日前盛裝現身電影首映禮，身穿橙配綠套裝嘅佢明艷照人，不過睇睇吓呢個搭色就熟口熟面，眼利嘅網民好快搵到答案，拍宣萱呢身行頭，巧妙地同TVB嘅處境劇《愛‧回家之開心速遞》，入面飾演清潔工群姐嘅 許思敏Isabella 撞衫，網民更鬼馬地幫宣萱P圖，令佢成為劇中「接龍公司清潔隊」隊員之一，望真啲兩人嘅穿搭真係幾乎一模一樣。
雖然同群姐撞衫一夜間成為全城熱話，但性格玩得嘅宣萱並未介意，更喺網上以「正」字嚟回應呢單笑料，顯得落落大方，亦有抵死嘅網民留言：「群姐，叫萱姐先啦﹗」、「呢個叫呼拉萱呼喚伊莎貝拉群嘅宣萱」，又問宣萱幾時會去愛回家客串下。
其實宣萱呢身裝扮係出自知名品牌，價值約5萬元，早前韓國女星宋慧喬都曾經著過呢套衫，正正同宣萱身上呢套一樣，所以宣萱除咗同清潔工群姐撞衫之外，亦都同喬妹嘅品味相投。
