譚耀文於2025年非常忙碌，舉行入行多年以嚟首個個唱，又以導師身份指導多位參加《聲秀》選秀比賽嘅學員，完成個唱後，阿譚立即回劇組趕拍，日前拍畢煞科戲便馬不停蹄，去上海參加一個內地電視台舉辦嘅跨年春晚特備節目，當晚與多位藝員及歌手合唱，以歌聲歡送2025，迎接2026到臨。
呢晚「麗花皇宮」四位靈魂人物「姚小蝶」鄧萃雯、「藍鳳萍」萬綺雯、「洪蓮茜」商天娥及「金露露」蔡曉儀世紀重聚，時隔近30年首度喺舞台上合體，瞬間引爆「回憶殺」，阿譚就喺社交平台留言表示非常感恩：「2025年可以忙到最後一秒鐘，真的非常感恩，此外在晚會上更難得喜遇《我和春天有個約會》四位主角包括商天娥、鄧萃雯、萬綺雯和蔡曉儀，我們立即互相集郵拍照留念，場面溫馨。」
林子祥與葉蒨文亦係當晚表演嘉賓，阿譚特別搵佢哋影合照：「我終於等到了，之前看他們香港演唱會時錯過了合照機會，今晚反而巧遇，也終於夢想成真、看來來年有運行！阿Lam和Sally真的好Nice，而我這個小粉絲開心到癲咗。」踏入2026年後，阿譚將集中時間去預備1月25日嘅廣州個唱，亦要出席「拼命三郎」重映場，以及「今天應該很高興」兩部電影嘅謝票活動。
